Кулун тутар 26—28 күннэригэр А.Е.Кулаковскай аатынан Норуоттар доҕордоһууларын дьиэтигэр XXIX төгүлүн ыытыллар «Олоҥхо дойдутун оҕотобун” бэстибээл олоҥхоһут П.П. Ядрихинскай — Бэдьээлэ 125 сылыгар ананан уһуйаан, оскуола оҕолорун ортолоругар олоҥхону олоҕурбут ньыманан бөлөҕүнэн уонна биирдиилээн толорууга, чинчийиигэ сүүрбэ тохсус төгүлүн тэрээһиннээхтик буолан ааста. Бэстибээлгэ Амма, Таатта, Чурапчы, Уус Алдан,  Мэҥэ Хаҥалас, Горнай, Нам, Бүлүү, Ньурба, Кэбээйи, Муома улуустарыттан  олоҥхону толорор уонна чинчийэр оҕолор, уһуйааччылар бэрт сэргэхтик кэлэн кыттыыны ыллылар. Ол иһигэр, оскуола оҕолоругар — 36 – биирдиилээн толорооччу, 14бөлөх, 12 оҕо чинчийэр үлэнэн кытыннылар.Детсад оҕолоругар – 16 бөлөххө 127 олоҥхону толорооччу, 11 биирдиилээн толорооччу кытынна. Детсад оҕолоругар  барыта — 138 оҕо кыттыыны ылла. Ыраах сытар хоту улуустартан (Кэбээйи, Муома) кэтэхтэн кытыннылар. «Эйгэ» норуот айымньытын дьиэтигэр дьарыктанар икки олоҥхо бөлөҕө кытынна «Чуораанчык» бөлөх салайааччы Алексеева Г. П., «Үрүмэччи» бөлөх салайааччы Шамаев М.Н. ситиһиилээхтик кытыннылар. Маны таһынан «Чуораанчык» бөлөх кыттыылаахтара Воловик Николай, Андреев Эрхан биирдиилээн олоҥхо толордулар.

Күрэх түмүгүнэн бөлөҕүнэн толорууга:

«Түөлбэ үгэһин утумнааччы» анал аат — «Чуораанчык» бөлөх.

«Боччум сэһэн» анал аат — «Үрүмэччи» бөлөх.

Биирдиилээн толорууга:

«Истээччи биһирэбилэ» анал аат — Воловик Николай.

Оҕолорбутун, уһуйааччыларбытын кыайыыларынан ис сүрэхпититтэн тахсар эҕэрдэ эгэлгэтин аныыбыт. Бары кыттыбыт оҕолорго инникитин да кыайыылары, хотуулары, төрөөбүт саха тылын, фольклорун илдьэ сылдьан өссө киэҥник, хабааннаахтык үөрэтэн илдьэ сылдьаргытыгар баҕарабыт.