Бүгүн Улуу Кыайыы өрөгөйдөөх үбүлүөйдээх 80 сылынан Кыайыы болуоссатыгар нэһилиэк олохтоохторо түөлбэлэринэн байыаннай колонна тэринэн парадтаан кэллилэр. Уулуссаларбыт киэркэйэн, кыһыл былааҕынан кытыастан, плакаттары тутан, байыаннай массыыналары оҥостон, Ураа хаһыынан, ырыа – тойук ыллааннар бары түмүстүлэр. Кыайыы болуоссатыгар киириигэ Росгвардия кылааһын оҕолоро киирэр дьону уруйдаан көрүстүлэр.

 Бастакы колоннаҕа нэһилиэкпит интэриэһин көмүскүүр, нэһилиэк олоҕо сайдарын туһугар үлэлиир “Саһарҕа” түөлбэ, Кыайыы күнүн параадын салайда “Саһарҕа” түөлбэ салайааччыта Григорьева Альбина Егоровна.

Иккис колоннаҕа биир түмсүүлээх биһиги нэһилиэк үүнэр-сайдар кэскилин түстүүр “Мичээр” түөлбэ.Өрөгөй күнүн параадын салайда “Мичээр” түөлбэ салайааччыта Иванова Татьяна Владимировна.

Үһүс колоннаҕа нэһилиэкпит киэн туттар тутаах үлэһиттэрэ,тарбахха баттанар, өрүү көхтөөх, эдэр көлүөнэни кэрэҕэ- сырдыкка угуйар “Алаһа” түөлбэ.Кыайыы күнүн параадын салайда “Алаһа” түөлбэ салайааччыта Осипова Валентина Николаевна.

 Төрдүс колоннаҕа  Кыайыы күнүн айхаллаан үөрэх-билии бараммат баайдаах,үүнэр кэнчээри ыччаттардаах,сырдыкка-кэрэ5э, олох киэн аартыгар кынаттанар   “Түһүлгэ” түөлбэ. Өрөгөй күнүн параадын салайда “Түһүлгэ” түөлбэ салайааччыта Прокопьева Саргылана Кимовна.

 Бүтүн Арассыыйатааҕы акцияҕа кыттыһан “Өлбөт өспөт полк» тэҥҥэ хаамыста.

Аттаах кавалериянан колонналаан киирдилэр, колоннаны салайда Семенов Станислав Дмитрьевич.Кыайыы Кыһыл Знамятын күөрэччи тутан Н.Н.Каратаев аатынан Тааһаҕар орто оскуолатын выпускниктара киирдилэр.

Кыайыы өрөгөйүн,дьоллоох олох үөрүүтүн аҕалбыт, Ийэ дойдуларын иннигэр ытык иэстэрин төлөөбүт, хорсуннук өлбүт буойуттарга кэриэстэбил веногун росгвардия кылааһын оҕолорун кытта ытыктыыр дьоммут сэрии оҕолоро.Кыайыы сырдык чаҕылыттан, чанчыктара кырыарбыт ветераннары чиэстии.Аҕа көлүөнэ эдэр сааһын, сүһүөххэ туран сүгүрүйэ, кэриэстии ,биир мүнүүтэ улуу чуумпуга иһийэн турууга бары сүһүөхпүтүгэр турдубут.Росгвардия кылааһа строевой хаамыыны көрдөрөн, байыаннай бэлэмнээхтэрин көрдөрдүлэр. “Улуу Кыайыыннан кынаттанан” диэн үөрүүлээх миитини  Тааһаҕар нэһилиэгэ муниципальнай тэриллии баһылыгар Каратаев Семен Самуилович үөрүүлээх быһыыга арыйда уонна Республика, улуус, нэһилиэк таһымнаах бэлэхтэри сэрии кэмин оҕолоругар туттартаата. Миитин кыттыылаахтарын сэрии кэмин оҕото, үлэ ветерана, Тааһаҕар нэһилиэгин Бочуоттаах олохтооҕо Андреев Виталий Иванович уонна нэһилиэк ветераннарын сэбиэтин бэрэссэдээтэлэ Шамаева Светлана Егоровна эҕэрдэлээтилэр.Кыһыл Сыыр бөһүөлэгиттэн Кыайыы автопробега Кыайыы Знамятын бэлиэтин туттаран өрөгөйү үрдэттэ. Кыһыл Сыыр бөһүөлэгин баһылыга Гвызин Юрий Станиславович эҕэрдэлээн туран Кыайыы Знамятын бэлиэтин Тааһаҕар нэһилиэгин баһылыгар Каратаев Семен Самуиловичка туттарда. Бүтүн Арассыыйатааҕы акцияларга  түмсүүлэр, тэрилтэлэр, оскуола оҕолоро кыттыылаах «Вальс Победы” эргийдибит,”Нам нужна одна Победа” ырыаны хорунан ыллаатыбыт.Кыайыы ырыалара, үҥкүүлэрэ болуоссаты толордулар.

Улуу Кыайыы 80  сылыгар УРАА!! Уруй буоллун!!! Айхал буоллун!!!Эйэ ыраас күнүн уота, сири чэлгитэн, бүтүн Аан дойду ньуурун өрүү сыламнаттын! Сир үрдүгэр сэрии суох буоллун!! Туругурдун ЭЙЭ!! УРАА! УРАА!!УРАА!!