Бүгүңңү үөрүүлээх түгэңңэ
Тоҕуоруһа мустубут
Ытык мааны дьоннорбутугар
Хоолдьуктаах бэйэбит
Хоңкуйан туран
Сүһүөхтээх бэйэбит
Сүгүрүйэн туран
Нөрүөн-нөргүйэн эрэбит.
Дьэ сити курдук киирии тыллаах бүгүңңү Кыайыы күнүн бэлиэтиир ветераннарга аналлаах «Эйэлээх олох туһугар» күөх уот саҕаламмыта.
Нэһилиэкпит баһылыга Каратаев Семен Самуилович уонна нэһилиэк государственнай тэрилтэлэрин салайааччылара, профсоюзтарын бэрэссэдээтэллэрэ итии-истиҥ тылларынан мустубут нэһилиэкпит ытык-мааны дьоннорун эҕэрдэлээн туран сэрии кэмин оҕолоругар бырааһынньыктааҕы бэлэхтэри туттардылар.
Бүгүңңү бырааһынньактаађы көрсүһүүбүтүгэр кэлэн олороллор, нэһилиэкпит Үүнэн сайдан иһэригэр сыаналаммат кылааты киллэрбит кэлэр көлүөнэ туһугар айар-тутар, иитэр үлэђэ өр сылларга үлэлээбит, билигин да үлэ-үөһүгэр сылдьар нэһилиэкпит араас көлүөнэ үтүөлээх дьонун ветераннар сэбиэттэрин председатэлэ Шамаева Светлана Егоровна эҕэрдэлээн Улуу Кыайыы 80 сылыгар тахсыбыт үбүлүөйүнэй мэдээллэри туттартаата.Нэһилиэкпит талааннаах ыччаттара эҕэрдэ кэнсиэрт бэлэхтээтилэр.
Толору астаах сандалы тула олорон ыллам ырыа ылланна, оонньуу тэрилиннэ. Ветераннар сэрии кыттыылаахтарын ахтан-санаан аастылар, сэрии кэннинээ5и оло5у, үлэни кэпсээтилэр.
Алгыс тылы этэн, уруйдаан-айхаллаан бүгүңңү дьоро киэһээни түмүктээтилэр. Убаастабыллаах ветераннарбытыгар олох үгүс үөрүүтэ үрүйэ уутунуу үксээтин, ођолоргут, сиэннэргит, чугас дьоңңут тапталыгар уйдаран доруобай, өлгөм олохтоох буолуң! Ил – эйэ эңэрдэстин!
