Сандал саас салаллан кэлбитин уруйдаан нэһилиэк олохтоохторо тоҕуоруһа мустан биир кэрэ күнү атаардылар. Бырааһынньыгы “Саас кэллэ” диэн уус — уран дьүһүйүүннэн арыйдыбыт уонна талба талааннаах уус-уран самодеятельность кыттыылаахтара эҕэрдэ концерт бэлэхтээтилэр.
Улуу Кыайыы 80 сылынан, Саха сиригэр Булчут күнүгэр аналлаах «Байанайдаах булчут» күрэҕэр Аҕа дойдуну көмүскүүр Улуу сэрии ветераннарын Докторов Алексей Афанасьевич, Каратаев Софрон Николаевич, Григорьев Нифонт Петрович,Прокопьев Егор Михайлович, Харлампьев Михаил Андреевич, Иванов Николай Дмитриевич, Иванов Михаил Николаевич,Ефремов Кирилл Петрович, Осипов Николай Иннокентьевич оҕолоро, сиэннэрэ спонсардаан күрэхтэһии үрдүк таһымҥа
ыытылынна. Күрэх түмүгүнэн I миэстэни Иванов Алковиад Алковиадович, II миэстэни Поскачин Петр Владиславович, III миэстэни Осипов Геннадий Александрович, IV миэстэни Семенов Станислав Дмитриевич ыллылар.
Күрэҕи өйөөбүт Аҕа дойдуну көмүскүүр Улуу сэрии ветераннарын оҕолоругар, сиэннэригэр ис сүрэхпититтэн махтанабыт, сыаналыыбыт.
Кыайыы 80 сылынан, Арассыыйаҕа Аҕа Дойдуну көмүскээччи уонна Уол Оҕо күнүгэр аналлаах «Уол Хоһуун» күрэх нэһилиэкпит спортсмен уолаттарын ааттарыгар ыытылынна. Ол курдук:
- Үрдүк категориялаах тренер, Саха Өрөспүүбүлүкэтин спордун бэтэрээнэ, хапсаҕайга спорт маастара Айвар Николаевич Каратаев
- Хотугу многоборьеҕа Российскай Федерация спорт маастарыгар кандидат, Саха Республикатыгар спорт маастара, XXI Манчаары оонньууларын кыттыылааҕа,” Бүлүү Боотур» күрэххэ ыстаныыга уонна ыраах дистанцияны сүүрүүгэ 2 миэстэлээх, чэпчэки алтетикаҕа республика призера уонна чемпиона Айаал Никифорович Никифоров.
- Мас тардыһыытыгар Бүтүн Арассыыйатааҕы чемпионат призера, Республикатааҕы “Саҥа ааттар” турнир призера Ким Васильевич Прокопьев.
- Национальнай многоборьеҕа спорт маастарыгар кандидат, Бүлүү Боотур кыайыылааҕа Дмитрий Алексеевич Петров.
- Ытыыга уонна көҥүл тустууга бастакы разрядтаах, волейболга, баскетболга, остуол тенниһыгар республика призера, росгвардия кылааһын салайааччыта Алковиад Алковиадович Иванов.
Кэлэр кэнчээри ыччаты эт-хаан өттүнэн сайдалларыгар күрэххэ спонсордаабыт спортсмен уолаттарбыт бириистэрин хаһаайынынан буоллулар:
I миэстэ – Ян Веревкин, II миэстэ – Айаал Суханов, III миэстэ – Олег Борисов, IV миэстэ – Данил Веревкин.
Маны таһынан «Түөлбэ-түмсүү түһүлгэтэ” күрэх чэрчитинэн “Көрдөөх стартар”, канат тардыһыытын түмүгүнэн I миэстэ- “Алаһа” түөлбэ, II миэстэ “Түһүлгэ” түөлбэ, III миэстэ “Саһарҕа” түөлбэ, IV миэстэ “Мичээр” түөлбэ буоллулар.
Нэһилиэкпит олохтоохторо, оҕолоро биирдиилээн күрэхтэргэ, конкурстарга кыттан бириис тутан астынан тарҕастылар.Ас-үөл дьаарбаҥката тэриллэн дьон көхтөөхтүк ас арааһын атыылаатылар.
Сандал саас сылаас күннэрэ бука барыгытыгар үтүөнү кэрэни бэлэхтээтин,өрүү күүскэ өйөнсөн өрөгөйү тутуоҕуҥ!
