Муус устар 4 күнүгэр Н.Н.Каратаев аатынан Тааһаҕар орто оскуолатыгар Гавриил Иосифович Чиряев 100 сааҺыгар аналлаах өрөгөйдөөх тэрээҺин  буолла. Саха народнай поэта Михаил Елисеевич Тимофеев Гавриил Иосифович  Чиряев сырдык кириэһигэр анаан суруйбут “Киһи аата” диэн хоһоонунан “Эйгэ” норуот айымньытын Дьиэтин үлэһиттэрэ, уһуйар оҕолоро тэрээһини арыйдылар.  Дириҥ суолу хаалларбыт сүдү киһибитин ахтан аастылар “Тааһаҕар нэһилиэгэ” (тыа сирин түөлбэтэ) муниципальнай тэриллии баһылыгын солбуйааччыта Григорьева Ульяна Николаевна, өр сылларга Тааһаҕар орто оскуолатыгар дириэктэринэн үлэлээбит Васильев Семен Иванович уонна нэһилиэк Сэбиэтин депутата Осипов Родион Алексеевич кэлэр кэскиллээх кэнчээри ыччакка сахабыт сирин чулуу киһитин сырдатан, билиилэрин хаҥаттылар. Өрөгөйдөөх чаас Геннадий Осипов “Сахам сирэ” ырыатынан дохсун ытыс тыаһынан түмүктэннэ.

Олохтоох библиотекаҕа “Улуу киһи аата умнуллубат” патриотическай күрэхтэһии ыытылынна, оскуола орто кылааһын оҕолоро кыттыыны ыллылар. “Бухатыырдар” уонна “Урааҥхайдар” диэн икки хамаанда арахсан, 10 түһүмэхтээх күөн – күрэскэ актыыбынайдык оонньоотулар, олуһун диэн сэргээтилэр. Күрэс түмүгүнэн кыайыылааҕынан  “Бухатыырдар”  хамаанда таҕыста, хамандыыр Алина Харлампьева. Оҕолор сүдү киһибит туһунан элбэҕи билэн, сэҥээрэн бардылар.

Судаарыстыбаннай уонна политическай диэйэтэл, ССКП КК чилиэнэ, ССРС уонна Саха АССР Үрдүкү Сэбиэтин дьокутаата, ССКП Саха уобаластааҕы кэмитиэтин бастакы сэкиритээрэ, Аҕа дойду Улуу сэриитин кыттыылааҕа Гавриил Иосифович Чиряев 17 сыл устата Саха сирин салайбыта, саҥаны олоххо киллэрбитэ, инникигэ дьулуһуулаах уонна айымньылаах киэн туттар, өрүү махтанар киһибит буолар. Кини көмүс аата өлбөөдүйбэт, норуотугар оҥорбут үтүөтэ умнуллубат. Кэнчээри ыччакка үтүө холобур, сулус буолан тырымнаатын.