Сэтинньи 12 күнүгэр Тааһаҕардааҕы “Эйгэ” норуот айымньытын дьиэтигэр Тааһаҕар нэһилиэгин Ытык олохтооҕо,В.О.Каратаев аатынан Аар Дьаҕыл норуодунай кэлэктиип кыттыылааҕа,олоҥхоһут, алгысчыт, Саха Республикатын  Ил Дарханын “Төрүт култуураны үйэтитээччи-олоҥхоһут” анал аат истипиэндийээтэ, Саха Республикатын култууратын, үөрэҕириитин туйгуна Григорьева Маргарита Егоровна  80 сааһыгар аналлаах “Олоҥхо алыптаах абылаҥа” биэчэри Күндүл үҥкүү ансаамбыла, Күбэйэ Хотун этно-фольклорнай бөлөх, Чоргуй хомусчуттара дьүһүйүү оҥорон арыйдылар.

Күндү ыалдьыттары Маргарита Егоровна күөх түптэни унаарытан кэңэрдии сытын кэччирэтэн арчылаата, ыраастаата. Маргарита Егоровна бэйэтэ салайан элбэх оҕону олоҥхо эйгэтигэр киллэрдэ, үгүс үрдүк ситиһиилэннэ.Уһуйааччыларыгар  “Үрүмэччи”  ансаамбыл кыра бөлөҕө, Тааһаҕар олоҥхоһуттара ансаамбыл олоҥхолоон иһитиннэрдилэр.Маргарита Егоровнаны кэрэ бэлиэ күнүнэн, дьоһун сааһынан куйаар ситиминэн биллиилээх этнопедагог, педагогическай наука кандидата,Илин Сибиирдээҕи Федеральнай университет культрология кафедратын профессора Попова Галина Семеновна – Санаайа,Республикатааҕы Олоҥхо киинин  научно-методическай уонна норуоттар икки ардынааҕы сибээстэрин сүрүн специалиһа Флегонтова Ульяна Михайловна,Олоҥхо киинин сүрүн специалиһа РС культуратын Үтүөлээх үлэһитэ “Олоҥхо дойдутун оҕотобун” фестиваль салайааччыта Сысолятина Зоя Григорьева эҕэрдэлээтилэр.Истиц махтал тылларын Тааһаҕар нэьилиэгин баһылыгын солбуйааччы Григорьева У.Н, нэһилиэк Бочуоттаах олохтоохторо Васильев С.И.,Харлампьева М.Е.,Григорьева Н.Д. оскуола профсоюһун председателя Каратаева О.С.тиэртилэр.

Григорьева Маргарита Егоровна «Ыас хара аттаах күүстээх — уохтаах Толлуман бухатыыр» олоҥхотун Тааһаҕар орто оскуолатын үөрэнээччилэрин оҥорбут анимационнай киинэлэрэ  көһүннэ. Үүнэр көлүөнэ ыччаппыт туһугар, нэһилиэкпит сайдарын туһугар үлэлиир-хамныыр Маргарита Егоровнаҕа  махтал тылбытын тиэрдэбит. Үтүө-мааны киһибит, өссө да субу курдук дьоҥҥун-сэргэҕин алгыы-силии, олоҥхоҕунан угуйа, ыччаттаргын уһуйа этэҥҥэ сырыт, уһуннук олор диэн барҕа баҕа санаабыт бастыҥын аныыбыт!