Олунньу 14-15 күннэригэр Чурапчы нэһилиэгэр оройуоннааҕы «Айылгы» НАДь Өрөспүүбүлүкэтээҕи норуот тыйаатырдарын икки ардыларыгар ыытыллар «Алыптаах Мааска» күөн күрэс буолла. Уопсайа холбоон 15 тыйаатыр (3-һэ кэтэхтэн), 205 артыыс, 300-тэн тахса көрөөччү муһунна.
«Алыптаах Мааска» бэстибээл бырайыагын ааптара Сунтаардааҕы норуот тыйаатырын режиссера, СӨ култууратын үтүөлээх үлэһитэ Юрий Дмитриевич О. буолар.
«Эйгэ» НАДЬ «Эгэлгэ» көр-күлүү норуот тыйаатыра Д.К. Сивцев –Суорун Омоллоон «Күөх Көппө» икки көстүүлээх кэмиэдийэтин туруоран ситиһиилээхтик кыттан «За волю к победе» диэн анал аат ыллылар. Режиссер- Михаил Шамаев, художник-оформитель Алексей Осипов.
Дьүүллүүр сүбэ хайҕабылын Дьэбдьиэ оруолун толорбут Агафья Суханова, айымньы куттара Гульнара Алексеева, Христина Осипова уонна эдэр артыыстар Любамир Прокопьев, Айсен Баишев ыллылар. Испиктээкил тухары көрөөччүлэр күлэн-үөрэн ытыс таһынан биһирэбиллэрин биллэрдилэр. Тыйаатыр артыыстара атын тыйаатырдар испиктээкиллэрин, маастар кылаас көрөн астынан кэллилэр.
Бэстибээл үөрүүлээх кэнсиэригэр «Эйгэ» НАДь исписэлииһэ Христина Осипова, А. Егорова тыл., М. Макарова-Барахсаана мат. «Тааһаҕарбар» диэн ырыаны бэлэх уунна.
