Ыам ыйын 8 күнүгэр киэһэ 9 чаас 30 мүнүүтэҕэ нэһилиэкпит олохтоохторо, ытыктабыллаах сэрии кэмин оҕолоро, үлэ ветераннара, кэнчээри ыччаттара, Кыайыы болуоссатыгар муһуннулар. Аҕа дойду Улуу сэриитигэр баран сырдык тыыннарын толук уурбут буойуттарга, сэрии ветераннарыгар, үлэ фронун кыттыылаахтарыгар, тыылга үлэлээбит ытык дьоммутугар  Улуу Кыайыы 80 сылыгар аналлаах кэриэстэбил “Өйдөбүнньүк чүмэчи” акцияҕа кыттыстыбыт.

Нэһилиэк дьаһалтатын баһылыга Каратаев С.С.“Эйэлээх олохпут иһин  кыргыһыы хонуутугар сырдык тыыннарын толук уурбут биир дойдулаахтарбытынан киэн туттабыт, кинилэр хорсун быһыылара,  ааттара  көмүс буукубаннан суруллан үйэлэргэ сүппэт сырдык өйдөбүл буолуоҕа” диэн туран кэриэстэбил мүнүүтэ биллэрдэ.

Н.Н. Каратаев аатынан Тааһаҕар орто оскуолатын лидера Баишев Айсен “Улуу Кыайыы  аҕалбыккыт, кэскиллээх олоҕу түстээбиккит иһин сүһүөхтүүн сүгүрүйэбит, хоолдьуктуун хоҥкуйабыт!” диэн тыл эттэ.

Биһиги эйэлээх олохпут иһин тыыннарын толук уурбут хорсун буойуттарбыт сырдык ааттарын ытыктаан  кириэстэбил чүмэчи уурдубут.