Кулун тутар 14 күнүгэр биһиги нэһилиэкпитигэр «»Эркээйи Эргиирэ»: оҕо уонна ыччат сайдар эйгэтин тэрийии» өрөспүүбүлүкэтээҕи бырагыраама айар бөлөҕө, национальнай эпоһы харыстааһыҥҥа «Олоҥхо ассоциацията» өрөспүүбүлүкэтээҕи уопсастыбаннай тэрилтэ көҕүлээһининэн «Оҕо киhи киhитэ буола сайдар эйгэтин тэрийии ньымалара» диэн өрөспүүбүлүкэтээҕи семинар тэрээһинигэр «Эйгэ» норуот айымньытын Дьиэтин үлэһиттэрэ “Олоҥхону толорорго туттуллар ньымалар, дьарыктар” диэн олукка кыттыыны ыллылар. Олугу М.К.Аммосов аатынан Хотугулуу- Илиҥҥи Федеральнай университетын научнай чинчийэр үлэһитэ, СР Олоҥхо ассоциациятын салайааччыта Шишигина Феврония Васильевна салайан ыытта. “Эйгэ” НАДь уус –уран салайааччыта РС культууратын туйгуна Алексеева Г.П. куруһуоктар уонна түмсүүлэр салайааччылара Осипова Х.И. “Эгэлгэ” көр-күлүү норуот театрын режиссера Шамаев М.Н. оҕолору олоҥхоҕо уһуйууга,үөрэтиигэ дьарыктарын кэпсээтилэр, санаа атастастылар.

Күн иккис аҥаарыгар “Эйгэ” норуот айымньытын түмсүүлэрин уонна уус-уран  куруһуоктарын Олоҥхо педагогикатынан салайтаран “Эркээйи эргиирэ” бырагыраама иитинэн ыытыллар үлэни  куруһуоктар уонна түмсүүлэр салайааччылара Осипова Х.И. билиһиннэрдэ. Күн устата уус-уран оҥоһук түмсүүлэрин быыстапката тэриллэн дьон сэҥээриитин ыллылар.

Түмүктүүр чааска  нэһилиэкпит олоҥхоһута, Ил Дархан Гранын стипендията Григорьева М.Е. “Ыас хара аттаах күүстээх-уохтаах Толлуман бухатыыр” олоҥхотун “Эгэлгэ”  норуот театрын артыыстара, “Тааһаҕар олоҥхоһуттара” олоҥхо ансаамбылын  кыттыылаахтара испиктээх көрдөрдүлэр. Туруорааччы режиссер Михаил Шамаев. Кэлбит ыалдьыттар тэрилтэбит  үлэтин билсэн көрөн, оҕону иитиигэ ыытыллар үлэлэрин биһирээн тарҕастылар. Нэһилиэкпит тэрилтэлэрэ, түмсүүлэрэ, үүнэр көлүөнэ  ыччаты иитиигэ өссө да ситимнээхтик үлэлээн сайдан истиннэр. Үүнэр көлүөнэ ыччаппыт туһугар, нэһилиэкпит сайдарын туһугар үлэлиир-хамныыр бар дьоммутугар махтал тылбытын тиэрдэбит.