Ыалдьытымсах дьонноох Талыы талба хонуулаах, күлүмүрдэс уулардаах Күбэйилиир эбэлээх Тааһаҕарбыт сиригэр ыраахтан-чугастан кэлбит мааны ыалдьыттарбыт, мэлдьи саныы сылдьар биир дойдулаахтарбыт, умнубат уруу-аймах дьоннорун ыҥыртаан, уйгу-быйаҥ олбохтоох Улуу Тунах Ыһыаҕын ыһар, кэпсээҥҥэ киирбит кэрэ чэчирдэрин анньар, хоһооҥҥо хоһуйуллубут хомоҕой тойуктаах түһүмэхтээх түһүлгэтин бэс ыйын 25 күнүгэр нэһилиэкпит «Түһүлгэ” ыһыахтыыр пааркатыгар төрүттээтэ.
Саха барахсан санаатын сылаанньытар, бороҥ ураанхай эрэлин бөҕөргөтөр, бүгүҥҥү күн үтүөнү түстээтин диэн Үөһээ Үрдүк Айыылартан, аһатан-таҥыннаран олорор Аарыгырар Айылҕаттан, иитэн-харайан олорор Ийэ сиртэн көрдөһөн, Аал уотун оттон араҕас илгэнэн айах тутан Алгыс тылын таһаарда Григорьева Маргарита Егоровна.
Үйэлэр тухары үтүө сурахтаах Өрөгөй үктэллээх,үөрүү-дьол эркиннээх Тааһаҕар нэһилиэгэр ыытыллар Тыа сирин үлэһит дьонун сылыгар аналлаах уруйдаах ыһыаҕын нэһилиэк бэлиэтин Тааһаҕар кэскиллээх ыччата, үөрэх-билии туйгуна, Айаал Шамаев Аҕа Баһылыкпытыгар туттарда. Үрүҥ Тунах Ыһыахпыт аһыллыытын бэлиэтэ буолар оһуор-мандар ойуулаах, алгыстаах харысхаллаах нэһилиэкпит былааҕын өрө тутан Аҕа Баһылыкпыт Каратаев Семен Самуилович Кыайыы Ыһыаҕа арыллыбытынан мэктиэ туруорда. Аҕа Баһылыкпыт Каратаев Семен Самуилович “Нэһилиэк бочуоттаах олохтооҕо» үрдүк аатын туттарда Иванов Антон Николаевичка уонна Поскачина Акулина Кирилловнаҕа, үөрүүлээх быһыыга туттарда.
Ону таһынан сыана үрдүк уораҕайыттан үрдүк наҕараадалары туттулар Тааһаҕар талааннаах дьоно-сэргэтэ:
Семенова Мария Иннокентьевна «Мастер — умелец Тасагарского наслега»
Шамаева Светлана Егоровна «За вклад в социально-экономическое развитие Тасагарского наслега»
Куланова Мария Аскалоновна «За вклад в развитие образования Тасагарского наслега»
БЛАГОДАРСТВЕННОЕ ПИСЬМО НАРОДНОГО ДЕПУТАТА ГОСУДАРСТВЕННОГО СОБРАНИЯ ИЛ ТУМЭН РС (Я) ГОГОЛЕВА А.В.
Поскачина Мария Гаврильевна, Герасимов Петр Титович, Осипов Алексей Алексеевич
ПОЧЕТНАЯ ГРАМОТА МР «ВИЛЮЙСКИЙ УЛУС (РАЙОН)»
Иванова Людмила Егоровна, Ксенофонтова Лилия Руслановна, Поскачина Варвара Николаевна.
БЛАГОДАРСТВЕННЫЕ ПИСЬМА МР «ВИЛЮЙСКИЙ УЛУС (РАЙОН)»
Шамаев Николай Михайлович, Харлампьев Андрей Дмитрьевич, Алексеева Гульнара Павловна.
Үрүҥ Тунах ыһыахпыт аһыллар Алгыс оһуохайын нэһилиэкпит талааннаах ыччата Осипова Христина Ивановна таһаарда.
Үрүҥ Тунах ыһыахха кэлбит ытык-мааны ыалдьыттарбыт, күндү биир дойдулаахтарбыт! Саха дьонун сырдык санаатын ырата буолар сылга биирдэ ыытыллар саамай бастыҥ бырааһынньыга – саргылаах ыһыах саҕаланан, өрөгөйдөөх ыһыах төрүттэнэн, уруйдаах оонньуу олохтонноҕо буолуохтун!
