Ырыа-тойук аргыстаах, ыалдьытымсах дьонноох Талыы талба хонуулаах, күлүмүрдэс уулардаах Күбэйилиир эбэлээх Тааһаҕарбыт сиригэр ыраахтан-чугастан кэлбит мааны ыалдьыттарбыт, мэлдьи саныы сылдьар биир дойдулаахтарбыт, умнубат уруу-аймах дьоннорун ыҥыртаан, уйгу-быйаҥ олбохтоох Улуу Тунах Ыһыаҕын ыһар, кэпсээҥҥэ киирбит кэрэ чэчирдэрин анньар, хоһооҥҥо хоһуйуллубут хомоҕой тойуктаах түһүмэхтээх түһүлгэтин бэс ыйын 27 күнүгэр нэһилиэкпит «Түһүлгэ” ыһыахтыыр пааркатыгар төрүттээтэ.
Саха барахсан санаатын сылаанньытар, бороҥ ураанхай эрэлин бөҕөргөтөр, бүгүҥҥү күн үтүөнү түстээтин диэн Үөһээ Үрдүк Айыылартан, аһатан-таҥыннаран олорор Аарыгырар Айылҕаттан, иитэн-харайан олорор Ийэ сиртэн көрдөһөн, Аал уотун оттон араҕас илгэнэн айах тутан Алгыс тылын Григорьева Маргарита Егоровна амалыйда. Үйэлэр тухары үтүө сурахтаах
Өрөгөй үктэллээх,үөрүү-дьол эркиннээх Тааһаҕар нэһилиэгэр ыытыллар Улуу Кыайыы 80 сылыгар аналлаах уруйдаах ыһыаҕын нэһилиэк бэлиэтин сэрии кэмин оҕото Андреев Виталий Иванович Аҕа Баһылыкпытыгар туттарда. Үрүҥ Тунах Ыһыахпыт аһыллыытын бэлиэтэ буолар оһуор-мандар ойуулаах,алгыстаах харысхаллаах нэһилиэкпит былааҕын өрө тутан Аҕа Баһылыкпыт Каратаев Семен Самуилович Кыайыы Ыһыаҕа арыллыбытынан мэктиэ туруорда. Аҕа Баһылыкпыт Каратаев Семен Самулович “Нэһилиэк бочуоттаах олохтооҕо» үрдүк аатын Герой Ийэ, сэрии сылын оҕотугар Прокопьева Мария Васильевнаҕа уонна сэрии сылын оҕото Андреев Виталий Ивановичка үөрүүлээх быһыыга туттарда. Бүлүү улууһун социальнай боппуруоска солбуйааччыта Комаров Александр Игоревич нэһилиэк олохтоохторун улуус дьаһалтатын аатыттан эҕэрдэлээтэ уонна улуус баһылыга Винокуров Сергей Николаевич Эҕэрдэ суругун нэһилиэк Аҕа Баһылыга Каратаев Семен Самуиловичка туттарда.
Үрүҥ Тунах ыһыахпыт аһыллар Алгыс оһуохайын нэһилиэкпит талааннаах ыччата Шамаев Михаил Николаевич таһаарда.
Ыһыахха кэлбит ытык-мааны ыалдьыттарбыт, күндү биир дойдулаахтарбыт! Саха дьонун сырдык санаатын ырата буолар сылга биирдэ ыытыллар саамай бастыҥ бырааһынньыга – саргылаах ыһыах саҕаланан, өрөгөйдөөх ыһыах төрүттэнэн, уруйдаах оонньуу олохтонноҕо буолуохтун!
