Республиканскай  VIII Олоҥхо Ыһыаҕа «Үрүҥ хайалар туралларын тухары, Аан дойду тутааҕа тулхатыйбат» диэн ааттанан Нерюнгри куоракка  от ыйын 3-5 күннэригэр ыытылынна. Биһиги нэһилиэктэн  “Олоҥхо оспот омоон суолунан” күрэххэ биирдиилээн толорууга Сайыына Шамаева 1 Үрдэл кыайыылааҕынан буолла. Маны таһынан Нарыйаана Шамаева “Удьуор утумун тутааччы”, Христина Осипова “Тэтими тутааччы”,  Айаал Суханов анал ааттары ыллылар.Уонна олоҥхону бөлөҕүнэн толорууга “Үрүмэччи” ,  “Тааһаҕар ыччаттара”  бөлөхтөр  (салайааччы  Михаил Шамаев) “Күргүөмнээх толорооччулар” анал ааттары  ыллылар. Бастакытын улахан түһүлгэгэ сүрэхтэммит “Сардаҥа” олоҥхо ансаамбыл оҕолоро (салайааччы Христина Осипова) кыттыбыттарын туоһулуур сурук туттулар, олоҥхону тута хоһуйуу күрэххэ Айаал Суханов «Кэскиллээх толорооччу» номинацияны ылла.

“Кут кистэлэҥ иэйиитэ” тойуксуттар күрэхтэригэр Михаил Шамаев Кылаан кыайыылаах үрдүк аатын ылла.

“Аламай Күн алыптаах үҥкүүтэ” оһуохай күрэгэр Алексей Шамаев биһирэбил бириис, “Олоҥхо персонаһын ырыата-тойуга” күрэххэ Михаил Шамаев, Христина Осипова,Сайыына Шамаева анал аат хаһаайыттарынан буоллулар.

Нэһилиэкпит  ууһа Шамаев Николай Михайлович “Батыйа –эр хоһуун санаа уонна үрдүк таһым бэлиэтэ”, “Быһах эр киһи кутун күүһэ”, уонна хобо оҥоруутугар “Өбүгэ үйэлээх ситимэ” күрэхтэргэ анал аат  уонна хомус уустарын күрэгэр “Кэскиллээх уус” аатын ылла.

Кылаас салайааччытыгар А.А.Наховаҕа,  “Үрүмэччи”, “Сардаҥа” ансаамбыл төрөппүттэригэр оҕолор  сайдалларын өйөөн күүс-көмө буолбуккутугар махтанабыт.

Республикатааҕы Олоҥхо Ыһыаҕын түһүлгэтигэр нэһилиэктэрин аатын  дорҕоонноохтук ааттаппыт айар-тутар талааннаах дьоммутун, талба талааннаах ыччаттарбытын,оҕолорбутун ис сүрэхтэн үөрэн туран эҕэрдэлиибит, киэн туттабыт.