ТааҺаҕардар Саҥа 2025 сылы «Эйгэ» норуот айымньытын Дьиэтигэр үөрүүлээхтик арыйдылар. Быйыл Аҕа дойду Улуу сэриитигэр Улуу Кыайыы өрөгөйдөех 80 сылын туолар. Онон сиэттэрэн Арассыыйаҕа Аҕа дойдуну көмүскээччи, Саха Өрөспүүбүлүкэтигэр Ийэ дойдуну көмүскээччи сылларынан биллэриллибитин уус уран самодеятельность кыттыылаахтара сэрии кэмин ырыаларынан, үҥкүүннэн көрдөрдүлэр. Түмэл хоҺугар «Кыайыыны уҺансыбыт ытык дьоммут» быыстапка уурулунна. Юнармиялар, Росгвардиялар кэлэр көлүөнэ ыччаттар Кыайыы Знамятын күөрэччи көтөхтүлэр, Кыайыы ырыата ылланна. Биир бэлиэ түгэнинэн  Саха Республикатын культуратын уонна духуобунаһын министра А.Ноев тохсунньу 28 күкүнээҕи  бирикээһинэн   сэрии сылын оҕото, СР культуратын туйгуна Иванова Людмила Егоровнаҕа «Саха Өрөспүүбүлүкэтин уус — уран самодеятельность ветерана» үрдүк бэлиэни анаабытын үөрүүлээх быһыыга туттарыы буолла. Сыл арыллыытын  кэнсиэрт түөрт блогунан ыытылынна.

Салгыы Бүлүү улууҺугар Саха Саарына  Г.И.Чиряев сылынан биллэриллибитинэн литературнай-музыкальнай композиция буолла. ТааҺаҕар нэҺилиэгэр “Оҥорон таҺаарыы” сылын нэҺилиэк баҺылыга Каратаев Семен Самуилович үрдүк трибунаҕа биллэрэн, олохтоохтор ытыс тыаҺынан  көрүстүлэр. Төрөөбүт дойдубут, Тааһаҕарбыт туһунан нарын, кэрэ ырыалар ылланнылар. Тэрээһиццэ кыттыбыт уус-уран самодеятельность кыттыылаахтарыгар барҕа махталбытын тиэрдэбит.

Тапталлаах Тааһаҕарбыт, күндү Күбээйибит чэчирии сайдарыгар, аата суола сураҕыра турарыгар, дьоно-сэргэтэ олоҕо тупсарыгар бары түмсэн өссө күүскэ үлэлиэҕиҥ. Ханнык да кэмнэ, ханна да сылдьан Киэн тутун, эн дойдугунан — Тааһаҕаргынан.