Сэтинньи 5 күнүгэр  Саха сиригэр култуура, Бүлүү улууһугар утум уонна үүнүү-сайдыы, улууспут култууратын эйгэтигэр биллиилээх олоҥхоһут В.О. Каратаев төрөөбүтэ 100, В.О. Каратаев аатынан оолоҥхоһуттар уонна тойуксуттар “Аар Дьаҕыл” норуодунай кэлэктииптэрин тэриллибитэ 35 сылларын чэрчитинэн уонна Олоҥхо күнүн көрсө В. О. Каратаев аатынан Олоҥхо дьиэтигэр биир дойдулаахтарбыт, олоҥхону сэҥээрээччилэр, төрүт үгэһи утумнааччылар  Бүлүү улууһун ытык-мааны олоҥхоһута, үтүө тыллаах алгысчыта Маргарита Егоровна Григорьева 80 сааһыгар аналлаах «ОЛОҤХО АЛЫПТААХ АБЫЛАҤА…» үбүлүөйдээх дьоро түһүлгэтигэр төбүрүөннээн түмүстүлэр. Маргарита Егоровна аналлаах күнүн бар дьонун алҕаан-силээн саҕалаата. Салгыы олоҥхону оҕолорго үөрэтиигэ маастар-кылаас ыытта.14:00 чаастан бэйэтэ суруйбут «Кулан кугас аттаах Толлуман бухатыыр» олоҥхотуттан биир чаас устата олоҥхолоон кэпсээн-ипсээн, ыллаан-туойан маанылаата. Сэһэнэ сэргэҕинэн, куолаһа чөллөркөйүнэн, тыына уһунунан, ырыата-тойуга толорутунан сөхтөрдө, дорҕоонноохтук «НОО!» дэттэ! Маргарита Егоровнаны олоҕун алгыстаах сааһынан улуус баһылыгын социальнай политикаҕа солбуйааччыта А. И. Комаров, култуура сайдыытын уонна норуот айымньытын Оройуоннааҕы киинин салайааччыта А. А. Дашевская, Бүлүү куоратын баһылыгын э. т Н. В. Иванов, Н. И. Ылахова аатынан «Алгыс» национальнай- култуурунай киин дириэктэрин э. т. Р. А. Томскай, В. О. Каратаев аатынан олоҥхоһуттар уонна тойуксуттар “Аар Дьаҕыл” норуодунай кэлэктииптэрин салайааччыта С. Т. Иванова, оскуолаҕа бииргэ үөрэммит дьүөгэлэрэ, Тааһаҕар нэһилиэгин баһылыгын солбуйааччыта У. Н. Григорьева, «Эйгэ» норуот айымньытын киинин дириэктэрэ К.В. Петрова, Тааһаҕар оскуолатын алын сүһүөх кылааһын учууталала А. Е. Григорьева, уһуйбут уонна уһуйа сылдьар ыччаттара эҕэрдэлээтилэр. Үөрбүт, долгуйбут төрөппүт уола Саха сирин биир бастыҥ ууһа Николай Михайлович сабыс-саҥа оҥорбут хомуһун уонна быһыччатын бэлэхтээтэ.