Көмүс саастаах ытык-мааны дьоммутун Аан дойдутааҕы Аҕам саастаахтар күннэринэн итиитик-истиҥник эҕэрдэлээн араас хабааннаах тэрээһиннэр ыытылыннылар. Үлэҕэ-хамнаска баай уопуккутун, олоххо-дьаһахха муудараскытын, үтүө-мааны майгыгыт үүнэр эдэр көлүөнэҕэ үтүө холобур буоларын билинэбит уонна истиӊник махтанабыт. Төрөөбүт нэһилиэккит норуотун хаһаайыстыбатын, социальнай-экэнэмиичэскэй, духуобунай сайдыытыгар уонна култуурунай олоҕор, успуорт көрүӊэр киллэрбит дьоһуннаах кылааккытын үрдүктүк сыаналыыбыт уонна күн бүгүн биһигини кытта тэҥҥэ айа-тута, сүбэлии-амалыы сылдьаргытыттан үөрэбит.
Декада арыллыыта “Эйгэ” норуот айымньытын дьиэтигэр алтынньы 1күнүгэр буолла. Эйгэ НАДь куруһуоктары салайааччыта Корнилова К.А.маастар кылаас, режиссер Шамаев М.Н. уонна библиотекарь Веревкина М.А. араас күрэхтэри ыытылыннылар.
Саха балаҕаныгар декаданы түмүктүүр «Көмүс саас күлүмүрдэс кэмнэрэ” биэчэргэ нэһилиэк ытык-мааны дьоно тоҕуоруһа мустан эдэр сааһы эргитэн иһирэхтик кэпсэтэн, ыллаан-туойан, оонньоон-көрүлээн,үҥкүүлээн аастылар.
Эдэр чэгиэн сылдьыахха, бары бииргэ хамсаныахха эрчимнээх хамсаныыннан биэчэр саҕаланна, мантан салгыы “Мин баайым-мунньар дьарыгым” коллекционердар быыстапкалара кэлбит дьон болҕомтотун тарта. Өр сылларга муспут коллекциятынан СР культуратын туйгуна Иванова Людмила Егоровна бастаата. Кыттыбыт коллекционердар Тимофеева Н.П.,Поскачина А.К. эмиэ бэлиэтэннилэр. Геннадий Осипов ырыатынан доҕуһуоллатан кэлбит ветераннар нэһилиэк государственнай тэрилтэлэрэ тэрийбит мааны сандылытыгар аастылар.Нэһилиэк баһылыга Каратаев С.С. Ытык саастарын туолбут дьонун-сэргэтин эҕэрдэлээтэ.Ветераннар Советтарын аатыттан Осипов Р.А., “Күбэйэ” эбээлэр түмсүүлэрин салайааччыта Поскачина А.К. бэйэтин эҕэрдэлэрин эттилэр. “Эдэр саас иэйиитэ” дуеттар конкурстарыгар кыайыылааҕынан Тимофеева Н.П уонна Шамаева З.В., иккис тур кыайыылаахтарынан Пурханова М.Е.,Поскачина Е.А. буоллулар.Убаастабыллаах дьоммут чэгиэн доруобуйаны, күүстээх санааны, көхтөөх, уһун олоҕу баҕарабыт! Чугас дьоҥҥут тапталлара, истиҥ сыһыаннара санааҕытын кынаттаатын !
