Саламаат,алаадьы,
Кус миинэ далбардаах,
Көҥүл күөххэ үктэнэр,
Үтүмэн үгүс үөрүүлээх
Саха саҥа дьылынан,
Сааскы Ньукуола күнүнэн!
Самаан сайыны көрсө “Күөххэ үктэммиччэ көрүлүөҕүҥ” диэн тэрээһин нэһилиэкпит пенсионердарыгар ананан ыытылынна.
Эҕэрдэ тылынан мустубут ытык-мааны дьоммутун нэһилиэк баһылыгын солбуйааччыта Григорьева Ульяна Николаевна истиҥник эҕэрдэлээтэ. Сцена ветерана, Саха Республикатын культуратын туйгуна Осипов Павел Васильевич,нарын куоластаах Поскачина Елена Андреевна, Поскачина Мария Гаврильевна ырыаннан эҕэрдэлээтилэр. Мустубут ыалдьыттарбыт эдэр саас ырыатын санааннар тэҥҥэ ыллаһа олордулар.
Мантан салгыы нэһилиэкпит эр дьонноро Байанай бэрсибит кустарын кэһии гынан биэрбиттэрин, администрация үлэһиттэрэ астаан –үөллээн мааны остуол тэрийбиттэрин тула олорон кэпсэтэн, оонньоон, ыллаан аастылар.Күөххэ үктэммит бэлиэ күнү ыллаан-туойан,оҕо саас оонньуутунан, араас күрэхтэринэн түмүктээтилэр.Умнуллубат түгэни хаартыскаҕа түһэн үйэтиттилэр.
Уйгу- быйаҥ аргыстаах самаан сайын барахсан хас биирдии дьиэ кэргэҥҥэ үрдүк үүнүүнү,өлгөм сир аһын,үтүө сынньалаҥы, үгүс үөрүүнү аҕаллан.
Илгэлээх ардаҕын ибиирэн,
Торҕо күөҕү чэлгиттин!
Өлгөм отун үүннэрэн
Уйгуну-быйаҥы дэлэттин!
Алгыс курдук эриэ-дэхси
Үтүө сайын буолуохтун!
