Өктөөп өрөбүлүүссэйитин күнүн көрсө бүгүн биһиэхэ ураты тэрээһин – сабыс саҥа буруолуу сылдьар кинигэ сүрэхтэниитэ. Ол курдук биир дойдулаахпыт революционер, төлөннөөх бассабыык Прокопьев Иван Афанасьевич “Жизнь и деятельность” диэн кинигэ биһирэмин дьоро күнүгэр ыраахтан – чугастан дьон – сэргэ муһунна. Кинигэни сиэнэ Люция Андриановна Прокопьева иилээн-саҕалаан, муһан- таҥан эһээтин аатын үйэтитэр сыаллах таһаартарда.

 Тааһаҕар оскуолатын  библиотекара Поскачина Мария Васильевна кинигэни ырытта, олохтоох библиотека сэбиэдиссэйэ Веревкина Мария Александровна кинигэ быыстапкатын, Иван Афанасьевич хаартыскаларын быыстапкалаата. Олоҕун кэрчиктэрин алын кылаас учуутала Григорьева Альбина Егоровна билиһиннэрдэ.Дьон-норуот олоҕо тупсарын туһугар туруулаһан туран үлэлэспит биир дойдулаахпыт Иван Афанасьевич Прокопьев  сырдык олоҕун туһунан сиэнэ Прокопьева Люция Андриановна кэпсээтэ, мустубут дьон кэрэхсибилин ылла.Иван Афанасьевич Сэбиэскэй Сойуус сайдарын туһугар олус бэриниилээхтик үлэлээн 5 төгүл Үрдүкү Сэбиэт дьокутааттарын сийиэһигар талыллан сылдьыбытын туһунан история учуутала Григорьев Георгий Валерьевич сырдатта. Нэһилиэкпит Бочуоттаах олохтоохторо үлэ ветераннара Григорьева М.Е.,Харлампьева М.Е.,Григорьева Н.Д.,Васильев С.И.,Осипов Р.А. кинигэ сүрэхтэммитинэн Прокопьев И.А. ыччаттарын, сыдьааннарын санаан аастылар.Нэһилиэк баһылыга Каратаев С.С. уонна Н.Н.Каратаев аатынан орто оскуола коллективын аатыттан иитэр-үөрэтэр үлэҕэ завуч Степанова О.В. биир дойдулаахпыт революционер, төлөннөөх бассабыык Иван Афанасьевич Прокопьев “Жизнь и деятельность” диэн кинигэтэ тахсыбытынан эҕэрдэлээн истиҥ махталларын тиэртилэр.

Нэһилиэкпит биир бэлиэ суолталаах история биир кэрчигэр – саҥа былааһы туруулаһан охсуспут революционер, төлөннөөх бассабыык Иван Афанасьевич Прокопьев сырдык аатын үйэтитэр, сырдатар – кэлэр кэнчээри ыччаттарга ытык иэспит.