Улуу Кыайыы! Төһөлөөх сыранан, көлөһүнүнэн, өлүүнэн-сүтүгүнэн кэлбит күнүй? Биһиги бу күнү олус сыаналыыбыт, умнубаппыт, киэн туттабыт! Кыайыы өйдөбүлэ өлбөөдүйбэт, көлүөнэттэн көлүөнэҕэ тиэрдиллэр. Аан дойдуну аймаабыт, кыа хаанынан Ийэ сири ытаппыт, алдьархайдаах сэриини элбэх кыһалҕанан, өлүүнэн-сүтүүнэн биһиги эһэлэрбит, аҕаларбыт, убайдарбыт кырыктаах өстөөҕү кыайан аҕалбыттара.
1945 сыллаахха Берлин куоракка Рейхстах үрдүгэр Сэбиэскэй саллааттар өстөөҕү кыайбыт бэлиэлэринэн кыһыл былааҕы харах уулаах «Ураа!» хаһыынан күөрэччи туппуттара.
Улуу Кыайыы 80 сылыгар, Арассыыйаҕа Аҕа дойдуну көмүскээччи, Саха Өрөспүүбүлүкэтигэр Ийэ дойдуну көмүскээччи сылларыгар аналлаах улахан дьоҥҥо “Кыайыыны түстүүр үҥкүүлэр” диэн аһаҕас үҥкүү күрэҕэ “Эйгэ” норуот дьиэтигэр ыытылынна.
Күрэҕи сыаналаатылар:
- Томскай Валерий Вячеславович – СР культуратын уонна үөрэҕириитин туйгуна, Айылгы народнай үҥкүү ансамбылын салайааччыта.
- Григорьева Ульяна Николаевна – Тааһаҕар нэһилиэгэ муниципальнай тэриллии баһылыгын социальнай боппуруоска солбуйааччыта.
- Егорова Ульяна Васильевна – Абыйдааҕы искусство оскуолатын выпусницата, хореограф идэлээх “Абыйчаана”, “Сайдыына” ансаамбыллар үҥкүүһүтэ.
18-50 сааһыгар дылы саастаах үҥкүүһүттэргэ кыайдылар:
I Үрдэл аатын ылла — Туйаарыма” ансаамбыл Алексей Афанасьевич Миронов аатынан Мастаах орто оскуолата “Журавли”үҥкүүннэн хореограф Наталья Яковлева, Тоҕус нэһилиэгэ.
II Үрдэл аатын ылла — Афанасий Иванович Леонтьев аатынан Лөкөчөөн орто оскуолатын “Түмэн”ансаамбыл “Смуглянка” үҥкүүннэн салайааччы Мария Малышева, Лөкөчөөн нэһилиэгэ.
III Үрдэл аатын ылла -“Сайдыына”ансаамбыл “Синий платочек” үҥкүүннэн хореограф Мария Васильева, Тааһаҕар нэһилиэгэ.
50 сааһыттан үөһэ үҥкүүһүттэргэ кыайдылар:
I Үрдэл — “Күбэйэ”эбээлэр түмсүүлэрэ “Верните память” үҥкүүннэн салайааччы Акулина Поскачина, хореограф Мария Васильева.
II Үрдэл — “Чэбдигирдии” бөлөҕө “Өрөгөй үҥкүүтэ” үҥкүүннэн салайааччы Вера Васильева, хореограф Яков Уваровскай Арыылаах нэһилиэгэ.
“Бастыҥ салайааччы” анал ааты ылл — Мария Малышева Афанасий Иванович Леонтьев аатынан Лөкөчөөн орто оскуолатын “Түмэн” ансаамбылын салайааччыта.
“Сааһы билиммэт кэрэ абылаҥ” анал ааты ыллылар “Күбэйэ” эбээлэр түмсүүлэрэ.
“Кыайыыны түстүүр үҥкүүлэр” диэн аһаҕас үҥкүү күрэҕин Кылаан Чыпчаал үрдүк аатын ыллылар “Дугуйук” ансаамбыл “Боль матерей” үҥкүүннэн хореограф Мария Васильева, Тааһаҕар нэһилиэгэ.
Иэйиилэр сценаттан тэйэннэр
Көрөөччү дууһатын куустуннар,
Дьэрэкээн көстүүлэр кэлэннэр
Сааланы абылыы турдуннар…
Үҥкүүлээҥ, доҕоттоор, үҥкүүлээҥ
Үөрүүнү-көтүүнү үксэтиҥ,
Үҥкүүлээҥ, доҕоттоор, үҥкүүлээҥ
Улуукан Кыайыыны уруйдааҥ.
Бары кэлэн кыттыбыт үҥкүү ансаамбылларыгар, хореографтарга махталбытын тиэрдэбит. Уонна бу курдук тэтимҥитин ыһыктыман, мэлдьи үлэ үөһүгэр, эдэрдии эрчимнээхтик сылдьыҥ, өссө да үҥкүүлэр айылла турдуннар диэн баҕа санаабытын этэбит. Итинник үрдүк таһаарыылаахтык үлэлээҥ, айыҥ-тутуҥ!
