Алтынньы 6 күнүгэр биир дойдулаахпыт Шамаев Петр Виталиевич балаҕан ыйынааҕы быыбар түмүгүнэн Российскай Федерация Государственнай Думатын депутата буолбутун чиэстээн дойдутун дьоно үөрэ-көтө көрүстүлэр.
Бүгүн Тааһаҕардарга олус үөрүүлээх, өрө көтөҕүллүүлээх тэрээһин буолан ааста. Көрсүһүүнү «Күбэйэ» эбээлэр түмсүүлэрэ «Дойдум миэнэ Тааһаҕарым» ырыанан арыйдылар.
Государственнай Дума депутатынан талыллыбыт Петр Шамаевы кытта көрсүһүүгэ «Бүлүү улууһа (оройуона) муниципальнай оройуон баһылыга Винокуров С.Н., улуус депутаттарын Сэбиэтин депутата Константинов Е.Р. , «Тааһаҕар нэһилиэгэ» тыа сирин түөлбэтин баһылыга Каратаев С.С. кыттыыны ыллылар. Нэһилиэкпит аҕам саастаахтара Поскачин А.П., Григорьева М.Е., Семенова Н.А, Васильев С.И., Харлампьева М.Е. алгыс тылларын анаатылар. Петр Виталиевич маҥнайгы учуутала Шамаев Н.М., ыччат дьоммут аатыттан 11 кыласс үөрэнээччитэ Андреев Харысхан, эдэр предприниматель Потапов Евгений бэйэлэрин баҕа санааларын тиэртилэр.
Киэҥ саалаҕа мустубут дьон эрэ барыта дуоһуйан, астынан, хас биирдиилэрэ үөрүүлэрэ, киэн туттуулара, инникигэ эрэллэрэ олус күүстээх, биир санаанан салайтаран түмсүүлээх буоларбыт бигэтик көһүннэ.
Петр Виталиевичка таһаарыылаах үлэни, чэгиэн туругу, саҥа арыйыылары баҕарабыт.
