Тыа хаҺаайыстыбатын күнүнэн, ТааҺаҕар нэҺилиэгэр Тыа хаҺаайыстыбатын сылынан үрүҥ илгэни үрүлүтээччилэри, эмис эти үөскэтээччилэргэ аналлаах «Тыа дьоно — үлэ төрдө» тэрээҺин сэтинньи 15 күнүгэр ыытылынна. ТэрээҺин ИП Потапов Е.В. саҥа хотонун үөрүүлээхтик арыллыытынан саҕаланна. НэҺилиэкпит ытык киҺитэ Григорьева Маргарита Егоровна үтүө тылынан алгыстаата, саҥа хотон аал уотун оттон үөртэ — көтүттэ. «Сайдыына» үҥкүү бөлөҕө Потапов Евгений Васильевич астаабыт кыынньар быырпаҕынан, арыылаах алаадьынан кэлбит ыалдьыттары айах тутан маанылаатылар. «Эйгэ» НАДь Тыа хаҺаайыстыбатын күнүн үөрүүлээх чааҺыгар «ҮлэҺит киҺини чиэстиэҕиҥ» тыа хаҺаайыстыбатын үлэҺиттэрин чиэстээҺин, наҕараадалары туттарыы, эҕэрдэ кэнсиэрт ыытылынна. Эҕэрдэ кэнсиэрткэ кыттыыны ыллылар БоҺоҥдо сайылык ыанньыксыттара, тыа хаҺаайыстыбатын бэтэрээн үлэҺиттэрэ.