Ааспыт 2022 сылга Тааһаҕар нэһилиэгэр биир саамай үөрүүлээх, күүтүүлээх түгэн ахсынньы ый 23 күнүгэр буолан ааста, «Эйгэ» НАДь 100 сылыгар бэлэх буолан саҥа сырдык, сылаас аныгылыы тутуулаах култуура дьиэтэ тутуллан, аанын арыйан өрөгөйбүт үрдээтэ, саҥа дьиэ аһыллыытыгар араас сиртэн элбэх ытык-мааны ыалдьыттар кэлэн саҥа кулуубу көрөн-махтайан бардылар. «Культура» национальнай проегынан тутуллубут саҥа дьиэбитигэр 150 миэстэлээх заал, профессиональнай музыка, уот -күөс тэриллэрэ, нэһилиэк библиотеката, музей, кружок хоһо, үлэһиттэр кабинеттара бааллар. Тэрээһиммит саҕаланыытыгар Ытык-мааны ыалдьыттарбытын айах тутан көрсөн, саҥа дьиэ арыйар аалай кыһыл лиэнтэни быһыы сиэрн туомун Саха Өрөспүүбүлүкэтин культууратын уонна духуобунай сайдыытын Миниистирэ Юрий Степанович Куприянов, «Саха Өрөспүүбүлүкэтин судаарыстыбаннай сакааһын сулууспата» судаарыстыбаннай казеннай тэрилтэтин генеральнай директорын эбээһинэһин толорооччу Гаврил Юрьевич Скрыбыкин, «Бүлүү улууһа (оройуона)» муниципальнай оройуон баһылыга Сергей Николаевич Винокуров, «Тааһаҕар нэһилиэгэ» муниципальнай тэриллии баһылыга Каратаев Семен Самуилович, «Тааһаҕардааҕы» норуот айымньытын Дьиэтин дириэктэрэ Петрова Клавдия Васильевна толордулар. Дьэ үөрүүлээх түгэн кэннэ саҥа Дьиэбитин ыраастыыр, арчылыыр Алгыс сиэрин-туомун нэһилиэк ытык киһитэ Николаев Николай Тимофеевич толордо, алгыһы иҥэринии кэннэ саҥа Дьиэ сырдык саалатыгар тэрээһин үөрүүлээх чааһа саҕаланна. Үөрүүлээх чааска үгэс курдук саҥа Дьиэ Мэҥэ күлүүһүн генеральнай бэдэрээччик, «СахаСтрой» хааччахтаммыт эппиэтинэстээх тэрилтэ директора Артур Гаврильевич Антонов туттарда, Саха Өрөспүүбүлүкэтин культууратын уонна духуобунай сайдыытын Миниистирэ Юрий Степанович Куприянов көстүүм тигэргэ 100 тыһ сууммалаах уонна 1 мөл киноустановка турарыгар сертификаттары бэлэхтээн олуһун диэн үөрпүтэ, сөхтөрбүтэ. Үөрүүлээх чааска элбэх киһи сүрэҕин сылытар, санаатын бөҕөргүтэр, кынаттыыр алгыс тыллар этилиннилэр, ылбаҕай ырыалар ылланнылар, бу күн Тааһаҕар нэһилиэгэр эрэ буолбакка, улууспутугар бүттүүн Республикабытыгар социальнай-духуобунай олоҕор суолталаах түгэн ааста.
