Үтүө сааскы күнүнэн күндү ДНТ «Эйгэ» сонуннарын ааҕааччылар, бүгүн Бүлүү улууһугар сэбиэскэй былааһы олохтоспут төлөннөөх революционер, сэбиэскэй партийнай үлэһит Павел Петрович Харлампьевка аналлаах тэрээһин буолла. Саха автоновнай сэбиэскэй социалистическай республика төрүттэммитэ 100 сылын көрсө биир дойдулаахпытын, Бүлүү улууһугар сэбиэскэй былааһы олохтоспут төлөннөөх революционеры, сэбиэскэй партийнай үлэһити Павел Петрович Харлампьевы санаан, ытыктаан ааһар күммүтүгэр нэһилиэк үөрэнээччилэрин,эдэр ыччатын хайыһарын десана кини өйдөбүнньүгэр айаннаан кэллэ. Ыччат дьоммут ытык киһилэригэр сүгүрүйэн холобур буоллулар, олохторугар умнуллубат түгэни сахтылар.

Харлампьев Павел Петрович өйдөбүнньүк памятнигар хайыһар десана тиийээтин кытары тэрээһиммит сүрүн чааһа саҕаланна, Тааһаҕар нэһилиэгин депутаттарын ааттарыттан Осипов Родион Алексеевич, Павел Петрович аймахтарыттан Харлампьева Мария Егоровна сиэнэ Харлампьев Павел Александрович,  киэҥ билиилээх, ырааҕы өтө көрөр саҥа олох туругурарын туһугар охсуспут дьиҥнээх коммунист Павел Петрович Харлампьевы ахтан санаан аастылар.

Тэрээһин түмүгүнэн Бүлүү улууһугар сэбиэскэй былааһы олохтоспут төлөннөөх революционер, сэбиэскэй партийнай үлэһит Павел Петрович Харлампьев өйдөбүнньүк памятнигар гирлянда ууруута буолла. Кыттыыны ылбыт Тааһаҕардааҕы Н.Н.Каратаев орто оскуолатын оҕолоругар, салайан кэлбит учууталларыгар, салайааччыларыгар, олохтоох администрацияҕа, Харлампьев Павел Петрович аймахтарыгар, кэлбит ыалдьыттарбытыгар барҕа махталбытын тиэрдэбит.